ಮೈಸೂರಿನ ರಾಮಕೃಷ್ಣಾಶ್ರಮದಲ್ಲಿ ಆಶ್ರಯವಿತ್ತು ಸಲುಹಿದ್ದಲ್ಲದೆ, ಕವಿಯ ಶಿಕ್ಷಣ ಮತ್ತು ಸಾಹಿತ್ಯಕ ಬದುಕಿನ ಜೊತೆಯಲ್ಲಿ ವೈಯಕ್ತಿಕ ಬದುಕಿಗೂ ಪ್ರೇರಕರೂ ಮಾರ್ಗದರ್ಶಿಗಳೂ ಆಗಿದ್ದ ಸ್ವಾಮಿ ಸಿದ್ಧೇಶ್ವರಾನಂದ ಸ್ವಾಮೀಜಿಯವರ ಸಲಹೆಯಂತೆ, ಅರ್ಜಿ ಸಲ್ಲಿಸಿದ್ದರಿಂದ ಇಂಟರ್ ಮೀಡಿಯೇಟ್ (ಇಂದಿನ ಯುವರಾಜ) ಕಾಲೇಜಿನಲ್ಲಿ ಉಪನ್ಯಾಸಕರಾಗಿ ವೃತ್ತಿಜೀವನ ಯಾನ ಪ್ರಾರಂಭವಾಗುತ್ತದೆ. ಈ ಯಾನ ಯಶಸ್ವಿಯಾಗಿ ಸಾಗಿ ಮುಕ್ತಾಯಗೊಳ್ಳುವುದು ತಾವು ಓದಿದ ವಿಶ್ವವಿದ್ಯಾನಿಲಯದ ಉಪಕುಲಪತಿಗಳಾಗಿ ನಿವೃತ್ತರಾದಾಗ! ವೃತ್ತಿಯಾನದ ಕೆಲವು ಮೈಲಿಗಲ್ಲುಗಳು:

• ೧೯೨೯ರಿಂದ ೧೯೩೯ – ಮೈಸೂರು ವಿಶ್ವವಿದ್ಯಾನಿಲಯದ ಇಂಟರ್ ಮೀಡಿಯೇಟ್ (ಇಂದಿನ ಯುವರಾಜ) ಕಾಲೇಜಿನಲ್ಲಿ ಮೊದಲಿಗೆ, ನಂತರ ಮಹಾರಾಜಾ ಕಾಲೇಜಿನಲ್ಲಿ ಉಪನ್ಯಾಸಕರಾಗಿ ಸೇವೆ.
• ೧೯೩೯ರಿಂದ ಮೈಸೂರು ವಿಶ್ವವಿದ್ಯಾನಿಲಯಕ್ಕೇ ಸೇರಿದ್ದ ಬೆಂಗಳೂರಿನ ಸೆಂಟ್ರಲ್ ಕಾಲೇಜಿನಲ್ಲಿ ಕನ್ನಡ ರೀಡರ್ ಹುದ್ದೆ.
• ೧೯೪೬ರಿಂದ ಮೈಸೂರಿನ ಮಹಾರಾಜಾ ಕಾಲೇಜಿನಲ್ಲಿ ಕನ್ನಡ ಪ್ರೊಫಸರ್ ಹಾಗೂ ವಿಭಾಗದ ಮುಖ್ಯಸ್ಥರಾಗಿ ಸೇವೆ.
• ೧೯೫೫ರಿಂದ ಮಹಾರಾಜಾ ಕಾಲೇಜಿನ ಪ್ರಾಂಶುಪಾಲರ ಹುದ್ದೆ.
• ೧೯೫೬ರಿಂದ ಮೈಸೂರು ವಿಶ್ವವಿದ್ಯಾನಿಲಯದ ಉಪಕುಲಪತಿಯಾಗಿ ಸಾರ್ಥಕ ಸೇವೆ.
• ೧೯೬೦ರಲ್ಲಿ ನಿವೃತ್ತಿ

ಕುವೆಂಪು ಅವರ ವೃತ್ತಿಬದುಕಿನ ಸಾಧನೆಗಳು ಹತ್ತು ಹಲವಾರು. ಉಪನ್ಯಾಸಕರಾಗಿ ಆ ಹುದ್ದೆಯ ಘನತೆ-ಗೌರವಗಳನ್ನು ಕುವೆಂಪು ಹೆಚ್ಚಿಸಿದ್ದಾರೆ. ಮೈಸೂರು ಸಂಸ್ಥಾನದ ಯುವರಾಜ ಇವರ ವಿದ್ಯಾರ್ಥಿಯಾಗಿದ್ದರು. ಯುವರಾಜನೆಂಬ ಕಾರಣಕ್ಕೆ ಯಾವ ವಿಧದಲ್ಲೂ ರಿಯಾಯಿತಿ ತೋರಿಸುವ ದಾಕ್ಷಿಣ್ಯಕ್ಕೆ ಕುವೆಂಪು ಒಳಗಾಗಲಿಲ್ಲ. ಅರಮನೆಯಿಂದ, ಯುವರಾಜರಿಗೆ ಮನೆಪಾಠ ಮಾಡಲು ಕರೆ ಬಂದಾಗ, ’ಈ ರಾಜಕುಮಾರರುಗಳಿಗೆ ಪಾಠ ಹೇಳುವುದಕ್ಕಿಂತಲೂ ನನಗೆ ಬೇರೆ ಉತ್ತಮತರ ಕೆಲಸವಿದೆ!’ ಎಂದು ನಿರಾಕರಿಸುವ ಧೈರ್ಯವನ್ನು ತೋರಿಸಿದ್ದರು. ’ಕನ್ನಡದ ವಿಷಯದಲ್ಲಿ ನಾನು ಟ್ಯಾಂಕಿನಂತೆ ಮುನ್ನುಗ್ಗುತ್ತೇನೆ; ನೀವು ದಾರಿ ಬಿಟ್ಟುಕೊಟ್ಟಿರೊ ಸರಿ. ಇಲ್ಲವೋ ಅಪ್ಪಚ್ಚಿಯಾಗುತ್ತೀರಿ’ ಎಂದು ಘರ್ಜಿಸಿ, ಉಪಕುಪಲತಿಯಾಗಿ ಅವರು ತೆಗೆದುಕೊಂಡ ಕನ್ನಡಪರ ನಿರ್ಧಾರಗಳಿಂದಾಗಿ, ಪದವಿ ಹಂತದಲ್ಲೂ ಕನ್ನಡ ಮಾಧ್ಯಮ ನೆಲೆ ನಿಲ್ಲುವಂತಾಗಿದ್ದು ಕರ್ನಾಟಕ ಇತಿಹಾಸದಲ್ಲಿ ಅತ್ಯಂತ ಮಹತ್ವದ ಮೈಲಿಗಲ್ಲು. ’ಬಾರಿಸು ಕನ್ನಡ ಡಿಂಡಿಮವ, ಓ ಕರ್ನಾಟಕ ಹೃದಯಶಿವ!’ ಎಂದು ಹಾಡಿ, ಮೈಸೂರು ವಿಶ್ವವಿದ್ಯಾನಿಲಯದ ಸ್ನಾತಕೋತ್ತರ ತರಗತಿಗಳನ್ನು ಮಹಾರಾಜಾ ಕಾಲೇಜಿನಿಂದ ಬೇರ್ಪಡಿಸಿ ಮಾನಸಗಂಗೋತ್ರಿಯಲ್ಲಿ ನೆಲೆನಿಲ್ಲಿಸಿದ್ದು ಅವರ ಧೀಶಕ್ತಿಗೆ ಮತ್ತೊಂದು ಮಹತ್ಸಾಕ್ಷಿ! ವಿಶ್ವವಿದ್ಯಾನಿಲಯದ ಸಂಶೋಧನಾಂಗ ಮತ್ತು ಬೋಧನಾಂಗಗಳಿಗಿದ್ದ ಕಾರ್ಯಪ್ರಾಮುಖ್ಯತೆಯನ್ನು ಪ್ರಸಾರಾಂಗಕ್ಕೂ ತಂದುಕೊಟ್ಟು ಅದನ್ನೊಂದು ಮಾದರಿ ಸಂಸ್ಥೆಯನ್ನಾಗಿ ರೂಪಿಸಿದ ಕೀರ್ತಿ ಕುವೆಂಪು ಅವರಿಗೆ ಸಲ್ಲುತ್ತದೆ.